lipu kijetesantakalu li seme?
toki pona la lipu nimi mute li lon.
lipu wan li lipu Linku.
taso tenpo ale la jan pali li sona pona ala e ni:
nimi seme o lon lipu? nimi seme o weka?
nimi "xnopyt" o lon anu seme?
nimi sin mute li lon li ken namako pona.
jan Sonja a li open e ni lon nimi kijetesantakalu.
musi kin la jan li pali e nimi musi lon tenpo toki.
jan li kARRma kalamARR ARRnte musi e nimi.
nimi ante li musi taso ala li namako e kon toki e nasin toki.
lipu ku li suli e nimi mute.
taso toki pona li pona li lili. nimi o mute nasa ala.
ni la lipu Linku li wile ala lon e nimi.
toki la nimi mute li weka.
jan ala li awen kepeken.
ken la nimi li musi lon tenpo wan taso.
taso nimi li awen lon lipu la jan li ken kama kepeken nimi tan lipu.
nimi li lon lipu tan toki.
nimi o lon ala toki tan lipu!
tan ni la lipu Linku la jan lawa li lon li wile ala e nimi musi mute.
taso jan li musi kepeken nimi la ona li awen wile pana e sona nimi lon lipu.
lipu kijetesantakalu ni li wile lon tawa nimi musi ni a.
sona pona li lon lipu kijetesantakalu la lipu Linku li wile mute ala e nimi.
nasin lawa li ante a lon lipu kijetesantakalu.
jan wan ala li lawa e sona. kulupu li lawa.
jan ale li ken pana e sona.
taso jan mute li ken pana e sona ante lon nimi sama.
nimi li ike li weka li sama nimi ante la jan ante li ken pana e sona pona.
sona li pona tawa jan la ona li kama suli lon lipu.
sina pali e nimi musi la o pana. lipu ni la nimi ale li ken musi. o musi! lipu kijetesantakalu li wile e nimi ale!
tan seme la sona nimi o toki pona taso?
toki pona li toki pona!
o kute e toki sona ni:
mi ken ala toki pona e ijo la mi sona ala e ona.
seme li lawa e lipu ni?
mi jan Tepo li pali e ilo li lawa e lipu.
sina lukin e ike la o toki tawa mi. sina ike la mi weka e sina.
sina ken toki tawa mi kepeken ni:
lipu li kepeken ilo seme?
o lukin e toki ilo lon ilo Kita.
mi kepeken toki ilo PHP. jan mute la ni li nasa. mi kepeken tan ni: pilin nasa pi jan ante li musi tawa mi.
lon la toki ilo ni li nasa. pakala li lon la ilo li toki nasa e pakala lon insa lipu (sama ni). taso ni kin li musi tawa mi.
toki ilo ni li ken e pakala mute ni: jan li ken pakala e lipu e mi e jan ante. mi sona e nasin pakala mute li lukin weka e pakala ale. taso sina kama sona e pakala la o toki tawa mi.